ՌԴ-ում առաջարկել են արգելել պաշտոնյաների ամանորյա արտասահմանյան ուղեւորությունները

«Եդինայա Ռոսիա»-ից Պետդումայի պատգամավոր Սուլթան Խամզաևն առաջարկել է արգելել պաշտոնյաներին՝ ամանորյա տոներին արտասահման մեկնել՝ ներքին զբոսաշրջությունը զարգացնելու համար. հայտնում է РИА Новости-ն։

Խորհրդարանականի կարծիքով՝ ճիշտ կլինի, եթե պաշտոնյաները արձակուրդներին հանգստանան Ռուսաստանում. այսպիսով՝ հնարավոր կլինի հասկանալ յուրաքանչյուր կոնկրետ տարածաշրջանի զբոսաշրջության ոլորտում առկա ցավոտ կետերը և արդեն աշխատել այդ խնդիրների լուծման ուղղությամբ։

Խամզաևն ասել է, որ քաղաքացիների համար հանգիստը պետք է լինի ավելի էժան, հարմարավետ և հաճելի։

Նրա խոսքով՝ այս նախաձեռնությանն աջակցել են բազմաթիվ պատգամավորներ, որոնք պատրաստվում են Նոր տարվա արձակուրդներն անցկացնել երկրում:

Պատգամավորը հավելել է, որ ինքը պատրաստվում է հանգստանալ իր տարածաշրջանում՝ Դաղստանում, այդպես կկարողանա «արձագանքել հասարակության կարիքներին»: Նաև՝ պատգամավորը խոստացել է պաշտոնատար անձանց շրջանում քարոզել երկրում հանգստի գաղափարը։