Բալթյան երկրները մայիսի 15-ից վերսկսում են առանց վիզա ուղևորությունները

Բալթյան երկրները՝ Էստոնիան, Լատվիան և Լիտվան ԵՄ-ում առաջինն են, որ իրենց բնակչության համար վերսկսում են կորոնավիրուսի պատճառով ընդհատված առանց վիզա այցելությունները. այս մասին Yerkir.am-ը տեղեկանում է schengenvisainfo.com կայքից։

Նշվում է՝ երկրի քաղաքացիները կկարողանան ճամփորդել արդեն մայիսի 15-ից։  Այսօր Լատվիայի, Լիտվայի և Էստոնիայի ԱԳ նախարարները Ռիգայում համապատասխան փաստաթուղթ կստորագրեն։

Փոխըմբռնման հուշագիրը կվերաբերի երկրների միջև ավտոմոբիլային, երկաթուղային, օդային և ծովային տրանսպորտի տեղաշարժի սահմանափակումների չեղարկմանը, ինչպես նաև կորոնավիրուսով պայմանավորված  ճգնաժամի ժամանակ համագործակցությանը։ Միևնույն ժամանակ, նշվում է, որ սահմանը հատելիս հնարավոր է առողջական վիճակի ընտրովի ստուգում։

Հիշեցնենք՝ մայիսի 14-ի տվյալներով՝ Լատվիայում հաստատվել է կորոնավիրուսի 962 դեպք, մահացել է 19 մարդ, Լիտվայում մինչ օրս գրացվել է 1511 վարակակիր, մահացել է 54 մարդ, Էստոնիայում հաստատված դեպքերի թիվը 1758 է, ինչի հետևանքով մահացել է 62 մարդ։