Եթե ​​պատերազմ լինի, Ռուսաստանը երեք օրից կհասնի Դնեպր. The National Interest

Ուկրաինայի հետ պատերազմի դեպքում ռուսական զորքերը Դնեպր կհասնեն 3-4 օրվա ընթացքում. հայտարարել են ամերիկացի փորձագետներ, ԿՀՎ-ի ռուսական վերլուծության բաժնի նախկին տնօրեն Ջորջ Բիբին և Դոնալդ Թրամփի օրոք պաշտպանության նախարարի նախկին խորհրդական Դուգլաս Մակգրեգորը The National Interest ամսագրում:

Փորձագետների կարծիքով՝ Ռուսաստանը հյուսիսից հարավ իր ցամաքային զորքերը կտեղակայի մինչև 200 հազար մարդուց կազմված աղեղով։ Իր պաշտպանության համար Ռուսաստանը կկիրառի ԲՄ-30 «Սմերչ» և «Իսկանդեր» համակարգերը, իսկ ուկրաինական երկինքը կլցվի ռուսական անօդաչու թռչող սարքերով և նորագույն զինամթերքով ինքնաթիռներով։ Ռուսական ուժերը պաշտպանվելու են Ս-400 և Ս-500 հակաօդային պաշտպանության համակարգերով, իսկ Ուկրաինայի և ՆԱՏՕ-ի ցանկացած ինքնաթիռ կամ անօդաչու սարք կհայտնաբերվի ու կոչնչացվի։

Հոդվածում նշվում է նաև, որ Բայդենի վարչակազմը չի դիտարկում ռուս-ուկրաինական հակամարտության դեպքում ուղղակի միջամտություն։ «Նման պայմաններում ռուսական ցամաքային ուժերը Դնեպր գետի երկայնքով իրենց օպերատիվ թիրախներին կհասնեն ընդամենը 72-96 ժամում։ Նման արշավին դիմակայելու՝ Կիևի կարողությունը խիստ կասկածելի է»,- ասվում է հրապարակման մեջ։