Թուրքիան և Իրանը պայմանավորվել են պատրաստել «ճանապարհային քարտեզ»

Թուրքիան և Իրանը պայմանավորվել են երկարաժամկետ համագործակցության ճանապարհային քարտեզ պատրաստել։ Այս մասին Թեհրանում իր թուրք գործընկեր Մևլութ Չավուշօղլուի հետ համատեղ մամուլի ասուլիսում հայտարարել է Իրանի արտգործնախարար Հոսեյն Ամիր Աբդոլլահիանը. հայտնում է Anadolu-ն։

Իրանցի նախարարը հայտարարել է Իրանի և Թուրքիայի հարաբերությունների զարգացման տեմպերն արագացնելու համատեղ մեխանիզմներ ստեղծելու ծրագրերի մասին։

Նրա խոսքով՝ դիվանագիտական բանակցություններ կսկսվեն Թուրքիայի և Իրանի միջև երկարաժամկետ համագործակցության ճանապարհային քարտեզի պատրաստման շուրջ, իսկ Թուրքիայի նախագահ Ռեջեփ Թայիփ Էրդողանի՝ Թեհրան այցի ընթացքում ղեկավարների մասնակցությամբ կստորագրվի համագործակցության հուշագիր։

«Երկու երկրները կապված են պատմական բարեկամության կապերով: Թեհրանը առանձնահատուկ նշանակություն է տալիս այդ հարաբերություններին: Թուրք գործընկերոջ հետ բանակցությունների ընթացքում ընդգծվել են համագործակցության կարևորությունը մի շարք ոլորտներում` առևտուր, տնտեսական, էներգետիկ, գործունեությունը հյուպատոսական հարցերում եւ սահմանային անվտանգության ապահովումը»,- ասել է Իրանի արտգործնախարարը։

Նա ընդգծել է, որ կողմերից ոչ մեկը լուրջ խոչընդոտներ չի տեսնում Թուրքիայի և Իրանի միջև հարաբերությունների զարգացման համար։

Աբդոլլահիանը նաև նշել է, որ կորոնավիրուսի համաճարակը վերջին երկու տարիների ընթացքում բացասաբար է ազդել երկու երկրների հարաբերությունների վրա։