ՏԵՍԱՆՅՈՒԹ․ Որևէ մեկը Փաշինյանի հետ ճանապարհ ունի՞ գնալու, որ ինքը ճանապարհային քարտեզ է ներկայացնում․ Միհրդատ Մադաթյան

Այդ ճանապարհային քարտեզը որ ներկայացրել է, նախ պետք է հասկանանք՝ որևէ մեկը Փաշինյանի հետ ճանապարհ ունի՞ գնալու՝ Yerkir.am-ի հետ հարցազրույցում հայտարարեց հոգեբան Միհրդատ Մադաթյանը «Հայրենիքի փրկության շարժման» հանրահավաքի ժամանակ՝ խոսելով վարչապետի ներկայացրած՝ երկրի 6-ամսյա վերականգնողական ծրագրի մասին։

«Նիկոլ Փաշինյանի լկտիության աստիճանը այլևս կասկածի դնելու չէ․ մարդը, որ հայրենիք է հանձնել Ադրբեջանին, դեռ պատրաստվում է մնալ իր աթոռին կառչած ու շարունակել իր ճանապարհը»,-ասաց նա։

Մադաթյանը ուշադրություն հրավիրեց, որ ճանապարհային քարտեզում բանակցելու կետ ևս կար։

«Ինձ հետաքրքիր է՝ ո՞նց է ինքը պատրաստվում բանակցել մի երկրի ղեկավարի հետ, ում ինքն է պարտվել, ի՞նչ լրջությամբ են իրեն նայելու, ի՞նչ լրջությամբ է ներկայացնելու այս երկիրը»,-ասաց նա։

Հոգեբանի կարծիքով՝ մարազմատիկ մի վիճակի մեջ ենք հիմա գտնվում և շարունակելու ենք այս վիճակի մեջ գտնվել այնքան ժամանակ, ինչքան Նիկոլ Փաշինյանի նման կերպարը փորձելու է ներկայանալ որպես մեր ղեկավար։

«Նիկոլ Փաշինյանը երբեք չի եղել իմ ղեկավարը՝ մանավանդ այս դավաճանական գործընթացներից հետո»,-ասաց նա։

Նշենք, որ հանրահավաքից րոպեներ առաջ ՀՅԴ Հայաստանի ԳՄ ներկայացուցիչ Իշխան Սաղաթելյանին կրկին հրավիրել են ՀՔԾ։

Հարցազրույցն ամբողջությամբ՝ տեսանյութում․