Հարավային Կովկասում «3+3» պլատֆորմի ձևավորումը կնպաստի Անկարայի և Երևանի միջև հարաբերությունների վերականգնմանը. Էրդողան

Թուրքիայի նախագահ Ռեջեփ Թայիփ Էրդողանը G20 գագաթնաժողովի ժամանակ նշել է, որ Անկարան հատուկ ուշադրություն է դարձնում Հարավային Կովկասում կայուն խաղաղության վերականգնման խնդրին։

Նրա խոսքով՝ Հարավային Կովկասում «վեցյակի» պլատֆորմի ձեւավորման շուրջ բանակցությունները շարունակվում են։

«Ադրբեջան, Թուրքիա, Ռուսաստան, Իրան, Վրաստան և Հայաստան, եկեք մեր վեցյակի միջև համատեղ քայլ անենք և խաղաղություն հաստատենք տարածաշրջանում»,- մասնավորապես ասել է Թուրքիայի ղեկավարը։

«Այդ կապակցությամբ պարոն Իլհամ Ալիևն արդեն առաջարկ է արել Հայաստանին տարածաշրջանում խաղաղության հաստատման վերաբերյալ։ Վրաստանի կողմից որոշակի բացասական վերաբերմունք կա, բայց եթե այս բոլոր երկրները դրական մոտեցում ցուցաբերեն, ապա այդ հարթակը կստեղծվի, և տարածաշրջանը կվերածվի խաղաղության հարթակի»,- պարզաբանել է Էրդողանը։

Թուրքիայի նախագահի խոսքով՝ նման հարթակի ձեւավորումը կնպաստի Անկարայի եւ Երեւանի միջեւ հարաբերությունների զարգացմանը դրական ուղղությամբ։