Եվրոպան մինչև սեպտեմբերի 30-ը ժամանակ է տվել Թուրքիային՝ ՄԻԵԴ վճիռները կատարելու համար

Եվրոպայի խորհրդի Նախարարների կոմիտեն, որը վերահսկում է ՄԻԵԴ որոշումների կատարումը, քննարկել է այն փաստը, որ Թուրքիան չի կատարել ՄԻԵԴ որոշումը, ըստ որի՝ հասարակական հայտնի գործիչ Օսման Քավալան և քրդամետ Ժողովուրդների դեմոկրատական կուսակցության նախկին համանախագահ Սելահաթթին Դեմիրթաշը պետք է ազատ արձակվեն կալանքից:

Կոմիտեն իր որոշմամբ Թուրքիային ներկայացրել է պահանջ՝ չեղյալ համարել Դեմիրթաշի կալանքի որոշումը և ազատ արձակել մինչև սեպտեմբերի 30-ը, իսկ Քավալային` նոյեմբերի վերջը. հայտնում է Euronews-ի թուրքական ծառայությունը։

Կոմիտեն նաև պահանջել է կատարել ՄԻԵԴ որոշումը՝ կապված Օսման Քավալայի հետ, սակայն, չնայած նախկինում հրապարակված տեղեկատվությանը, որ հանդիպման օրակարգում ներառված էր ՄԻԵԴ որոշման չկատարման պատճառով Թուրքիայի դեմ հնարավոր պատժամիջոցների հարցը, որոշվել է հետաձգել այս հարցի քննարկումը մինչև հաջորդ հանդիպումը, որը տեղի կունենա նոյեմբերի 30-ից դեկտեմբերի 2 -ը: