Գերմանացի մի քանի պատգամավորներ ալիևամետ քարոզչություն են իրականացնում Գերմանիայում

Գերմանական Deutsche Welle լրատվամիջոցն ուսումնասիրել է Ադրբեջանի իշխանությունների և Քրիստոնեա–սոցիալիստական միության՝ (ՔՍՄ) և Քրիստոնեա-դեմոկրատական միության (ՔԴՄ) գերմանացի քաղաքական գործիչների կապերը:

Ռեպորտաժում նշվում է, որ գերմանացի մի քանի քաղաքական գործիչներ օգնում են բարելավել Ալիևի վարկանիշը: Բեռլինի Բունդեսթագում նրանք ներկայացնում էին ԼՂ հակամարտության վերաբերյալ Ալիևի ռեժիմի տեսակետը: Ադրբեջանում դիտորդական առաքելությունների ժամանակ նրանք հրապարակավ հաստատել էին, թե ընտրություններն անցել են «ժողովրդավարական ճանապարհով»:

Ե՛վ Գերմանիայի Բունդեսթագում Բավարիայի ՔՍՄ նախկին անդամ Էդուարդ Լինտները, և՛ ՔԴՄ ներկայիս պատգամավոր Ակսել Ֆիշերը կասկածվում են կոռուպցիայի մեջ: Մոտավոր հաշվարկներով՝ լոբբինգի համար մի քանի միլիոն եվրո է փոխանցվել:

Գերմանիայի իրավապահ մարմինները հետաքննում են այն պնդումները, որ Ալիևի ռեժիմն այդ ծառայությունները ձեռք է բերել՝ կաշառք տալով գերմանացի քաղաքական գործիչներին: