Նիկոլը եւ նրա հանցախումբը պետք է իմանան, որ իրենք հավերժ չեն...

Բնակչության կենսամակարդակի աննախադեպ անկումը եւ տնտեսության լճացումը կարող են մեր պետությունում շատ լուրջ գործընթացների կատալիզատոր դառնալ, հանգեցնել մեր պետականությունը քայքայող մեխանիզմների գործարկմանը։ Եթե հիմա լուրջ փոփոխությունների չգնանք, ապա Հայաստանը դատապարտված է քաոսի և անարխիայի։

Իրավիճակն իսկապես ավելի քան լուրջ է ։ Բնակչության աղքատությունը, մարդկանց հսկայական շերտավորումը, տնտեսության լճացումը Հայաստանը վաղուց չի զգացել:Կտրուկ  փոփոխությունների, պլանային արդիականացման բացակայությունը հանգեցնում է քաոսի, վերահսկողության կորստի, բուն պետության փլուզման:Սակայն ներկայիս վերնախավը մինչ օրս չի գիտակցել այն փաստը, որ իր իմպոտենտ սոցիալ-տնտեսական քաղաքականությունը Հայաստանին տանում է դեպի անդունդ, հետագայում՝ քաոսի, դեգրադացիայի, ինքնաոչնչացման։

Հայաստանին շատ է անհրաժեշտ արդիականացումը, անհրաժեշտ են արմատական փոփոխություններ։ Աննորմալ է, երբ բոլորը բոլորի դեմ են։ Աննորմալ է, երբ շատ մեծ գումար   ծախսվում է պարգևավճար բաժանելու և սեփական թիմի շահերը սպասարկելու համար, իսկ միլիարդավոր դոլարներ դուրս են բերվում Հայաստանի սահմաններից։ Աննորմալ է, երբ ուժայիններն այսօր ներքաշված են սեփական ժողովրդի դեմ պատերազմի մեջ։ Դա լավ երևում է նրանց կամայականություններից։ Նրանք գործում են օրենքից դուրս և նույնիսկ մարդասիրության նորմերից դուրս:  Այսօրվա քաղաքական և տնտեսական իրավիճակում շատ աննորմալ բաներ կան։

Սակայն մեզանից յուրաքանչյուրը շահագրգռված է, որ մեր պետությունը, նրա տնտեսությունն ու հասարակությունը զարգանան: Իրավիճակը Հայաստանում վտանգավոր բնույթ է ձեռք բերել առաջին  հերթին երկրի անվտանգության և բնակչության համար: Սոցիալապես ակտիվ մարդկանց մեծ մասը խորապես վիրավորված և մտահոգված է ՀՀ-ում տեղի ունեցածից: Ոչ մի՝ առողջ դատողություն ունեցող մարդ չի կարող իր հայրենիքին ճակատագրական ավարտ մաղթել, որովհետև դա մեր կյանքն է, մեր երեխաների և թոռների կյանքն է… 

Նիկոլն այն մարդն է, որը չի կարող ճանաչվել ոչ միայն որպես ՀՀ-ի օրինական ղեկավար, այլեւ՝ ընդհանրապես, քաղաքական գործիչ... Նա իրավամբ արժանի է առավել բացասական բնութագրերի: Այն բանի հաշվին, որ երկրի կառավարման ապարատը նիկոլի ղեկավարման տարիների ընթացքում «մաքրվեց», եւ առանցքային պաշտոններին նշանակված են մարդիկ, որոնց նա անձամբ է ընտրել, եւ որոնք լիովին կախված են նրանից, ռեժիմը դեռևս պահպանվում է:

Պետության ղեկավարն ուղիղ առճակատման մեջ է մտել ժողովրդի հիմնական զանգվածի հետ:

Փաշինյանը հայրենակիցների հետ վարվում է ինչպես օկուպացիոն երկրի ներկայացուցիչ: Կարծես, գրոհով է վերցրել Հայաստանը, օգտվելով ընտրություններից՝ որպես պատրվակ, և հիմա գրաված տարածքի բնակիչներին ստիպում է հնազանդվել։ Թե որքա՞ն ժամանակ է դա շարունակվելու, պարզ չէ։

Նիկոլը և կառավարությունը պարտավոր են պատասխանատվություն ստանձնել իրենց գործողությունների համար, այլ ոչ թե զբաղվել պոպուլիզմով: Պետք է մշակել երկրի զարգացման իրական ռազմավարություն և մարտավարություն, այդ ժամանակ և՛ բիզնեսը, և՛ հասարակությունը կհասկանան, թե ուր է գնում Հայաստանը և ինչ կլինի նրա հետ միջնաժամկետ հեռանկարում։ Հայաստանը  մե՛ր Հայրենիքն է, ինչը չես ասի ներկայիս, այսպես կոչված «էլիտայի» մասին, որը խճճվել է իր ստերի մեջ:

Պատճառը պարզ է: Նրանցից շատերը չունեն պետական մտածելակերպ և պատրաստ են սպասարկել միայն սեփական շահերը: Ահա այս «փտածից», իմ կարծիքով, Հայաստանը պետք է ձերբազատվի։ Մենք պետք է հավատանք մեր ուժերին, մեր վաղվա օրվան, դրա համար ունենք բոլոր անհրաժեշտ ռեսուրսները։ Այդ դեպքում, հաստատ, ոչ մի քաոս ու ընդվզում չի լինի «հայկական փողոցում»։

Նիկոլը եւ նրա հանցախումբը պետք է իմանան, որ իրենք հավերժ չեն...

Մհեր Մելքոնյան

ՀՅԴ Շիրակի մարզային կոմիտեի ներկայացուցիչ