Թալիբները գրոհել են Աֆղանստանի մեծությամբ երկրորդ քաղաք Քանդահարը

«Թալիբան» ահաբեկչական խմբավորման զինյալները հարձակվել են Աֆղանստանի երկրորդ ամենախոշոր քաղաք Քանդահարի թաղամասերից մեկի վրա (2016 թվականի մարդահամարի համաձայն՝ 614 հազար բնակիչ), Tolo News-ին հայտնել են աղբյուրները:
Նրանց խոսքով՝ թալիբները քաղաքում երկու ավանպոստ են գրավել: Տեղի ոստիկանությանը հայտնել են, որ գրոհայիններին ճնշելու համար լրացուցիչ ուժեր են ժամանել Կանդահար:

Այն բանից հետո, երբ ԱՄՆ-ն եւ դրա դաշնակիցները զորքերը դուրս բերեցին Աֆղանստանից, թալիբները զանգվածային հարձակումներ սկսեցին: Աֆղանստանի տարածքի մեծ մասը, այդ թվում՝ Ուզբեկստանի ու Տաջիկստանի հետ սահմանին գտնվող տարածքները, անցել են ահաբեկչական խմբավորման վերահսկողության տակ, փոխանցում է ՌԲԿ-ն:

Աֆղանական բանակի ստորաբաժանումները, փախնելով առաջ շարժվող «Թալիբան»-ի ուժերից, մի քանի անգամ հատել են Տաջիկստանի հետ սահմանը: Այս կապակցությամբ Դուշանբեն հայտարարեց զորահավաքի մասին եւ եւս 20 հազար զինվորական կտեղափոխի սահման: Տաջիկստանում նաեւ հայտարարել են, որ սահմանը պաշտպանելու հարցում ապավինում են Հավաքական անվտանգության պայմանագրի կազմակերպության (ՀԱՊԿ) գործընկերների, այդ թվում՝ Ռուսաստանի օգնությանը: Ռուսաստանի նախագահ Վլադիմիր Պուտինը հաստատել է հանրապետությանն անհրաժեշտ աջակցություն ցուցաբերելու պատրաստակամությունը: