Իրաքում հրթիռակոծության է ենթարկվել Էրբիլի օդանավակայանը

Չորեքշաբթի գիշերը Իրաքի քրդական ինքնավար շրջանում գտնվող Էրբիլի օդանավակայանը հրթիռակոծման է ենթարկվել. օդանավակայանի օդային տարածքն ամբողջովին փակ էր: Այս մասին հայտնում է Al Arabiya հեռուստաալիքը:

Ըստ լրատվամիջոցի՝ հարձակումից հետո բոլոր ուղևորները տարհանվել են թռիչքային ուղու վրա կանգնած օդանավերից: Օդանավակայանի լուսավորությունն ամբողջությամբ անջատված է: Հնարավոր վնասի մասին դեռ տեղեկություններ չկան:

Հաղորդվում է, որ ավիահարվածի ազդանշանները հնչել են նաև Էրբիլում ամերիկյան հյուպատոսարանում:

Իր հերթին, Shafaq news լրատվական պորտալը, հղում անելով ինքնավար շրջանի հակաահաբեկչական վարչությանը, հաղորդել է, որ օդանավակայանը հարձակման է ենթարկվել անօդաչու սարքի կողմից: Հարձակման արդյունքում ոչ ոք չի տուժել: