Էրդողանն ու Մակրոնը համաձայնություն են ձեռք բերել Լիբիայից օտարերկրյա զինյալներին դուրս բերելու մասին․ Reuters

Երկուշաբթի Բրյուսելում ՆԱՏՕ-ի գագաթնաժողովի շրջանակներում կայացած հանդիպման ժամանակ Թուրքիայի նախագահ Ռեջեփ Թայիփ Էրդողանը իր ֆրանսիացի գործընկեր Էմանուել Մակրոնին ասել է, որ ցանկանում է, որ օտարերկրյա վարձկանները լքեն Լիբիան. հայտնում է Reuters- ը:

«Մենք պայմանավորվեցինք աշխատել այս ուղղությամբ: Դա կախված է ոչ միայն մեզանից՝ երկուսից: Բայց կարող եմ ձեզ ասել, որ նախագահ Էրդողանը մեր հանդիպման ժամանակ հաստատել է իր ցանկությունը, որ Լիբիայի տարածքում գործող օտարերկրյա վարձկաններն ու աշխարհազորայինները հնարավորինս շուտ լքեն երկիրը»,- գագաթնաժողովի ավարտին լրագրողներին ասել է Մակրոնը:

Ֆրանսիայի և Թուրքիայի ղեկավարների հանդիպումը առաջինն էր վերջին մեկ տարվա ընթացքում: Դա տեղի է ունեցել այն բանից հետո, երբ երկու երկրների միջև լարվածություն և  տարաձայնություններ սկսվեցին մի շարք հարցերի շուրջ՝ սկսած Թուրքիայի և Հունաստանի միջև Արևելյան Միջերկրականում վեճից մինչև Սիրիայի և Լիբիայի հակամարտությունները: