Երաժիշտ քույրերը մարդասիրական գործունեություն են ծավալում Խարբերդի մասնագիտացված մանկատան երեխաների համար

Աննա և Անահիտ Մխիթարյան քույրերը իրենց մարդասիրական և մասնագիտական գործունեությունը՝ հիմնված կամավորական հիմունքների վրա, ծավալում են Խարբերդի մասնագիտացված մանկատան երեխաների համար։

Մանկատան տնօրինության կողմից անհատույց տրամադրված սենյակները երաժիշտ քույրերը, վերանորոգման և կահավորման արդյունքում, տվել են երազանքների տան ջերմ մթնոլորտ, որտեղ մանկատան երեխաները սովորում են երգել, նվագել ազգային երաժշտություն։

Ստեղծել են «Ճախրուկ» էթնո երաժշտախումբը, որի առաջին ելույթը կայացավ հունիսի 1-ին «Ճախրուկ» մշակութային կենտրոնում, «Ճախրուկ» երազանքների տանը։

Ճախրուկը նույն Ճախրաբազե թռչունն է, որը քույրերը կապել են թե ՛երեխաների, թե՛ մեզանից յուրաքանչյուրի հետ։ Մարմնով Ճախրուկ՝ հոգում Ճախրաբազեն։

Մենք բոլորս պետք է արթնացնենք մեր ներսում քնած Ճախրաբազեին և պատրաստենք թռիչքի։

«Ֆիզիկական հնարավորությունները ոչինչ են, եթե չունես հոգու թռիչք» այսպես են մտածում քույրերը։ Նաև հիմնադրել են «Ճախրուկ» մշակութային հասարակական կազմակերպությունը, որը զբաղվելու է և՛ մշակութային, և՛ երեխաների առողջապահական հարցերով։ Հուլիսին տրվելու է «Ճախրուկ» միջազգային փառատոնի մեկնարկը Վանաձորում, որի ժամանակ ելույթ են ունենալու հենց իրենք՝Ճախրուկները և փառատոնի համերգային մասը բարեգործական հիմունքներով շարունակելու է Ճախրուկների և բոլորիս շատ սիրելի Արթո Թունջբոյաջյանը Արմենիան Նեվի բենդի հետ միասին։