Մենք որևէ մեկի դեմ պայքար չենք ծավալում. Արմեն Մարտիրոսյան

Հրազդանում կայացած հանարահավաքի ժամանակ «Ժառանգություն» կուսակցության փոխնախագահ Արմեն Մարտիրոսյանը նշեց, որ, անկախ այն բանից, թե գյուղատերին ինչպես կահաբեկեն, թե ուսուցիչներին ինչպես կվախեցնեն, դա էական չէ, որովհետև արդեն սկսել են պայքարը և պետք է համախմբվեն ու առաջ ընթանան:

Նա անդրադարձավ երեկ կառավարության նիստում Սյունիքի մարզպետի նշանակմանը` ասելով, որ Սուրեն Խաչատրյանին ևս մեկ անգամ չպետք է մարզպետ նշանակեին, որովհետև դա հարված էր հայերի արժանապատվությանը, ինքնիշխանությանը, որովհետև օրը ցերեկով գնդապետին գնդակահարած մարդն իրավունք չունի մարզպետ լինելու: «Մենք բոլորս միասին իշխանափոխություն ենք անելու»,- ասաց Արմեն Մարտիրոսյանը:

Նրա այս խոսքից հետո բազմությունը սկսեց վանկարկել` «Սերժի'կ, հեռացիր»: Արմեն Մարտիրոսյանը արձագանքեց` ասելով. «Այսօր մենք որևէ մեկի դեմ պայքար չենք ծավալում, պայքար ենք ծավալում հանուն Հայաստանի ու Ղարաբաղի, հանուն այն ազատամարտիկների, ովքեր իրենց կյանքը զոհեցին հանուն Հայաստանի ու Արցախի»: Նա փոխեց վանկարկման բովանդակությունը` գոչելով. «Հա-յաս-տան»: