Նեթանյահուն գնաց պատմության աղբանոցը, ինչպես Թրամփն ու Պոմպեոն, իսկ Իրանը պատվով կանգուն է մնացել. Զարիֆ

Իրանի արտգործնախարար Մոհամադ Ջավադ Զարիֆը Twitter-ի իր էջում մեկնաբանել է Իսրայելի վարչապետ Բինյամին Նեթանյահուի պաշտոնավարման ժամկետի ավարտը:

Թվիթում Զարիֆը մատնանշել է ԱՄՆ նախկին նախագահ Դոնալդ Թրամփին և նրա հակաիրանական երկու խորհրդականներին (Ազգային անվտանգության նախկին խորհրդական Ջոն Բոլթոնին և նախկին պետքարտուղար Մայք Պոմպեոյին) որպես Նեթանյահուի հանցակիցներ հակաիրանական քաղաքականությունը խթանելու գործում:

«Նեթանյահուն գնաց պատմության աղբանոցը, ինչպես իր հակաիրանական հանցակիցները՝ Բոլթոնը, Թրամփը և Պոմպեոն: Իրանը նախկինի պես պատվով է կանգնած: Սա է այն ճակատագիրը, որը բաժին է հասել բոլոր նրանց, ովքեր հազարավոր տարիներ ցանկանում էին վնասել իրանցիներին: Ժամանակն է փոխել ընթացքը»,– գրել է Զարիֆը: