Ռուսաստանը միշտ պատրաստ է թևութիկունք լինել եղբայրական հայ ժողովրդին. Լավրով

Ռուսաստանի արտգործնախարար Սերգեյ Լավրովը «Аргументы и факты» գործակալությանը տված հարցազրույցում անդրադարձել է ռուս-հայկական հարաբերություններին ու Արցախում տիրող իրավիճակին:

Լավրովի խոսքով՝ երկու երկրների հարաբերությունները կշարունակեն զարգանալ փոխվստահության և ռազմավարական գործընկերության ոգով: Նա հայտարարել է, որ Ռուսաստանը միշտ պատրաստ է թևութիկունք լինել եղբայրական հայ ժողովրդին, և դրա մասին վկայում են Ռուսաստանի, անձամբ նախագահ Պուտինի միջնորդական ջանքերը, որոնց շնորհիվ հնարավոր եղավ հասնել ԼՂ-ում ռազմական առճակատման ավարտին 2020-ի աշնանը և սկսել տարածաշրջանում իրավիճակի կարգավորման գործընթացը:

ՌԴ նախարարը նշել է, որ Ռուսաստանը քննարկում է կորոնավիրուսի դեմ Sputnik V  պատվաստանյութի հետագա մատակարարումները Հայաստան:

Լավրովը նաև շեշտել է, որ կողմերը զարգացնում են կապերը առևտրի և տնտեսության ոլորտում, ինչին նպաստում են ռուս-հայկական տնտեսական համագործակցության միջկառավարական հանձնաժողովի համանախագահների հերթական հանդիպումները: