Իրաքի ԱԳՆ-ն բողոքի նոտա է հանձնել Թուրքիայի ներկայացուցչին

Իրաքի արտաքին գործերի նախարարությունը երկուշաբթի Բաղդադում Թուրքիայի դիվանագիտական ներկայացուցչին բողոքի նոտա է հանձնել Իրաքի հյուսիսային նահանգներում Անկարայի վերջին գործողությունների կապակցությամբ. հայտնում է ՏԱՍՍ գործակալությունը:

Իրաքի արտաքին գործերի նախարարությունը հաղորդել է, որ նախարարություն է «կանչվել  Բաղդադում Թուրքիայի գործերի ժամանակավոր հավատարմատարը, որին հանձնվել է բողոքի նոտա՝ կապված Իրաքի տարածք Թուրքիայի պաշտպանության նախարարի՝ վերջերս չհայտարարված այցի հետ ՝ առանց Իրաքի համաձայնության կամ իշխանություններ նախնական հաստատման»:

Իրաքի ԱԳՆ-ի նոտայի մեջ նշվում է, որ Բաղդադը «կտրականապես մերժում է Իրաքի ինքնիշխանության շարունակական ոտնահարումները, Թուրքիայի զինված ուժերի կողմից Իրաքի հողային և օդային տարածքի անձեռնմխելիության ոտնահարումները, և որ այդպիսի մոտեցման շարունակությունն անհամատեղելի է բարիդրացիական ու բարեկամական հարաբերությունների հետ և հակասում է միջազգային իրավունքին»:

Ապրիլի վերջին Թուրքիայի զինված ուժերը Իրաքի հյուսիսում գործողություն են սկսել Քուրդիստանի աշխատավորական կուսակցության (ՔԱԿ) դեմ, որն Անկարայում համարվում է ահաբեկչական կազմակերպություն: