Լին Թրեյսին կանչվել է ՌԴ ԱԳՆ. նրան բողոքի նոտա է հանձնվել

Մարտի 7-ին Ռուսաստանի Դաշնությունում Ամերիկայի Միացյալ Նահանգների դեսպան Լին Թրեյսին կանչվել է ՌԴ ԱԳՆ և տեղեկացվել, որ ԱՄՆ երեք հասարակական կազմակերպություն Ռուսաստանի Դաշնությունում անցանկալի է ճանաչվել, որովհետև դեսպանատան աջակցությամբ իրականացվում են հակառուսական ծրագրեր և նախագծեր, որոնք ուղղված են կրթական և մշակութային փոխանակումների քողի տակ «ազդեցության գործակալների» հավաքագրմանը։ Այս մասին տեղեկանում ենք ՌԴ ԱԳՆ-ի տարածած հաղորդագրությունից։

«Դեսպանին հանձնվել է պաշտոնական նոտա՝ պահանջելով դադարեցնել ցանկացած օգնություն այս ՀԿ-ների գործունեությանը, որը, եթե շարունակվի, կհամարվի որպես ՌԴ օրենսդրության խախտում: Բացի այդ, պանջվել է դիվանագիտական առաքելության պաշտոնական կայքից և սոցիալական ցանցերից հեռացնել այս ՀԿ-ների կողմից իրականացվող կրթական նախագծերի և ծրագրերի ցանկը, որոնք ուղղված են ռուսաստանյան հասարակության համար օտար արժեքների խթանմանը»,- նշել են նախարարությունից։

Հատկապես ընդգծվում է, որ Ռուսաստանի Դաշնության ներքին գործերին միջամտելու փորձերը, ներառյալ դիվերսիոն գործողությունները և ապատեղեկատվության տարածումը ընտրությունների և հատուկ ռազմական գործողության համատեքստում, խստորեն և վճռականորեն կճնշվեն՝ ընդհուպ մինչև վտարումը («persona non grata»)։