Աֆղանստանում խաղաղ կարգավորման վերաբերյալ Ստամբուլի համաժողովը հետաձգվել է

Թուրքիայի արտգործնախարար Մևլյութ Չավուշօղլուն ապրիլի 20-ին կայացած մամուլի ասուլիսում հայտարարել է, որ Աֆղանստանում իրավիճակի վերաբերյալ համաժողովը, որը պետք է սկսվեր ապրիլի 24-ին Ստամբուլում, հետաձգվել է մինչ Ռամադան ամսվա վերջը: Այդ մասին հայտնում է թուրքական Haber7 լրատվական գործակալությունը:

Ապրիլի 24-ից մայիսի 4-ը Ստամբուլում պետք է տեղի ունենար Թուրքիայի կողմից կազմակերպված հանդիպում Աֆղանստանում իրավիճակի խաղաղ կարգավորման վերաբերյալ:

Հիշեցնենք, որ ինչպես Աֆղանստանի, այնպես էլ «Թալիբան» շարժման ներկայացուցիչները հրավիրվել էին երկրում խաղաղ կարգավորման թեմայով հանդիպմանը: Որոշ ժամանակ առաջ թալիբները հայտարարել էին, որ չեն մասնակցելու Աֆղանստանի վերաբերյալ որոշումներ կայացնող որևէ համաժողովի, քանի դեռ բոլոր արտաքին ուժերը լիովին դուրս չեն բերվել երկրի տարածքից:

ԱՄՆ–ը հայտարարել է, որ վեհաժողովի հետաձգումը չի նշանակում, որ խաղաղ բանակցություններն ընդհատվում են, իսկ Ստամբուլը չի կարող փոխարինել Դոհային (Աֆղանստանի վերաբերյալ բանակցությունների վայրը)։