ԵՄ-ն Անկարայում տեղի ունեցած սկանդալի պատճառով նախատեսում է փոխել դիվանագիտական արձանագրությունը

«Սոֆա–գեյթ»–ը, որը տեղի է ունեցել Թուրքիայի նախագահ Ռեջեփ Թայիփ Էրդողանի և ԵՄ խորհրդի նախագահ Շառլ Միշելի ու Եվրահանձնաժողովի նախագահ Ուրսուլա ֆոն դեր Լայենի հանդիպման ընթացքում, կարող է փոփոխություններ մտցնել 64 տարի առաջ ընդունված՝ ԵՄ դիվանագիտական արձանագրության մեջ: Այդ մասին հայտնում է թուրքական Sabah լրատվական գործակալությունը:

ԵՄ-ում ապրիլի 15-ին սուր քննադատության է ենթարկվել այն փաստը, որ Եվրահանձնաժողովի նախագահ Ուրսուլա ֆոն Դեր Լայենը բազմոցի վրա տեղ չէր ստացել Միշելի և Էրդողանի բանակցությունների ընթացքում:

ԵՄ-ում առաջին անգամ որոշում է կայացվել «modus vivendi»-ի (միջանկյալ համաձայնագիր) վերաբերյալ: Ըստ այդմ՝ ԵՄ դիվանագիտական արձանագրությունը կփոխվի, և այլևս նման խնդիրներից խուսափելու համար ԵՄ խորհրդի նախագահը և Եվրահանձնաժողովի նախագահը հետևելու են դիվանագիտական արձանագրության նույն կանոններին:

Եվրահանձնաժողովն արդեն ներկայացրել է ԵՄ Խորհրդին նոր արձանագրության իր առաջարկները: Բայց այն չի ընդունվել՝ հիմնավորմամբ, որ հանձնաժողովի առաջարկները պարունակում են որոշ տարրեր, որոնք չեն համապատասխանում ԵՄ խորհրդին: Այժմ Խորհրդի և Հանձնաժողովի միջև կքննարկվեն դիվանագիտական արձանագրության նոր հինգ կետեր: Այս հարցը նույնպես կքննարկվի Եվրախորհրդարանում: