Ստամբուլի մզկիթների բարձրախոսներից երաժշտություն է հնչել

Ստամբուլի մուֆթիյաթը հավատացյալների կողմից բողոքներ ստանալուց հետո հետաքննություն է սկսել քաղաքի մի քանի թաղամասերում մզկիթների բարձրախոսներից երաժշտություն հնչեցնելու դեպքերի առնչությամբ:

Ըստ թուրքական ԶԼՄ-ների՝ երկրի խոշորագույն քաղաքի ասիական մասի մի քանի շրջաններում մարտի 31-ի երեկոյան լսվել էր տեղի մզկիթների մինարեթներից հնչող երաժշտություն:

Ականատեսների խոսքով՝ թուրքական երգեր կարելի էր լսել Փենդիքում, Քարթալում և Թուզլայում: Նախնական տվյալների համաձայն՝ մզկիթի այդ համակարգը կոտրվել է հաքերների կողմից:

Հիշեցնենք, որ 2020-ի մայիսին ամբողջ Իզմիրում մզկիթներից հնչել էր իտալացի պարտիզանների «Բելլա չաո» երգը, ինչը երկրում մեծ աղմուկ էր բարձրացրել։