Չինաստանը պատժամիջոցներ է կիրառել Մեծ Բրիտանիայի դեմ

Չինաստանը հայտարարել է Մեծ Բրիտանիայից ինը ֆիզիկական անձանց և չորս իրավաբանական անձանց դեմ պատժամիջոցներ կիրառելու մասին: Համապատասխան հայտարարությունը տեղադրվել է ուրբաթ՝ մարտի 26-ին, ՉԺՀ արտաքին գործերի նախարարության կայքում:

Ըստ Չինաստանի ԱԳՆ-ի՝ ցուցակում, մասնավորապես, ներառված են Պահպանողական կուսակցության նախկին առաջնորդ Յան Դանքան Սմիթը, ինչպես նաև պահպանողականների մարդու իրավունքների հանձնաժողովը, որը, ըստ Պեկինի, «չարամտորեն սուտ ու ապատեղեկատվություն է տարածում»:

Ցուցակում հայտնված անձանց, ինչպես նաև նրանց ընտանիքների անդամներին արգելվում է ՉԺՀ տարածք մուտք գործելը: Բացի այդ՝ Չինաստանի քաղաքացիներին, ինչպես նաև ընկերություններին ու հաստատություններին արգելվում է գործարքներ վարել ցուցակի անդամների հետ:

Պեկինի որոշումը պատասխան է ԱՄՆ-ի, ԵՄ-ի, Մեծ Բրիտանիայի և Կանադայի գործողություններին, որոնք նախկինում հաստատել էին Չինաստանի նկատմամբ սահմանափակող միջոցները: Արևմտյան երկրներն իրենց քայլերը կապում են Չինաստանի՝ Սինցզյան Ույղուրյան Ինքնավար Մարզում էթնիկ և կրոնական փոքրամասնությունների նկատմամբ վարած քաղաքականության հետ։