Հունաստանի նախագահն ընդգծել է Ռուսաստանի ներդրումը հույների ազատագրական պայքարում

Ռուսաստանը, Ֆրանսիայի և Անգլիայի հետ, մեծ ներդրում է ունեցել հույների պայքարում Օսմանյան կայսրության դեմ 1821-1829 թվականներին և անկախ պետության ձեռք բերման գործում: Այդ մասին մարտի 24-ին հայտարարել է Հունաստանի նախագահ Կատերինա Սաքելլարոպուլուն: Նրա ելույթը հեռարձակվել է ազգային հեռուստաալիքներով:

Աթենքի Նախագահական պալատում տեղի է ունեցել Հունական հեղափոխության 200-ամյակին նվիրված հանդիսավոր միջոցառում: Դրան մասնակցել են Ռուսաստանի վարչապետ Միխայիլ Միշուստինը, բրիտանական գահի թագաժառանգ, Ուելսի արքայազն Չարլզը և Քորնուոլի դքսուհի Կամիլան, Ֆրանսիայի պաշտպանության նախարար Ֆլորանս Փարլին:

«Մեր ժողովուրդները երկարամյա բարեկամություն և ամուր կապեր ունեն ժամանակակից հունական պետության ծնունդ առնելուց ի վեր,- ասել է Սաքելարոպուլուն:- Կարևոր էր այն ժամանակվա մեծ տերությունների՝ Ֆրանսիայի, Անգլիայի և Ռուսաստանի ներդրումը պայքարում»:

Մարտի 25-ին Աթենքում տեղի կունենա ռազմական շքերթ`նվիրված հույների ազատագրական պայքարի մեկնարկի 200-ամյակին:

Հունաստանի՝ 1821-1829 թվականների ազգային-ազատագրական պատերազմի արդյունքում տապալվեց օսմանյան լուծը և նվաճվեց Հունաստանի անկախությունը: Այս պայքարում կարևորը 1828-1829 թվականների պատերազմում Ռուսաստանի հաղթանակն էր Թուրքիայի նկատմամբ: