Ռուսաստանը, ահաբեկչությունը և Չինաստանը ՆԱՏՕ-ի հիմնական սպառնալիքներն են

Ռուսաստանը, ահաբեկչությունը, Չինաստանի վերելքը և կլիմայի փոփոխությունը ՆԱՏՕ-ի հիմնական սպառնալիքներն են: Այս մասին առցանց մամլո ասուլիսում հայտարարել է Հյուսիսատլանտյան դաշինքի գլխավոր քարտուղար Իենս Ստոլտենբերգը՝ ներկայացնելով կազմակերպության տարեկան աշխատանքի վերաբերյալ իր զեկույցը:

«Ռուսաստանի ապակայունացնող պահվածքը, ահաբեկչությունը, կիբերհարձակումները, տեխնոլոգիաները, Չինաստանի վերելքը և կլիմայի փոփոխությունը մնում են մարտահրավերներ: Որևէ երկիր կամ մայրցամաք չի կարող ինքնուրույն հաղթահարել դրանք: Հետևաբար, մենք պետք է միասին աշխատենք ռազմավարական համերաշխության շրջանակներում»,- ասել է Ստոլտենբերգը:

Ստոլտենբերգը նշել է, որ Չինաստանը և Ռուսաստանը գնալով ավելի շատ են համագործակցում, այդ թվում`զորավարժությունների միջոցով, ինչը ՆԱՏՕ-ի հետագա անվտանգության մարտահրավերներն է ձևավորում: «Այս ամենը սահմանում է հետագայում ՆԱՏՕ-ի մարտահրավերները: Եվ այդ պատճառով կարևոր է, որ ՆԱՏՕ-ն շարունակի ադապտացվել ավտորիտար Չինաստանի և ավելի ագրեսիվ Ռուսաստանի մարտահրավերներին», - հավելել է նա: