Գորբաչովը նշել է, թե որը պետք է լինի ղարաբաղյան հակամարտության լուծումը

Խորհրդային Միության նախկին նախագահ Միխայիլ Գորբաչովը հուսով է, որ Ռուսաստանը կկարողանա օգնել Լեռնային Ղարաբաղի հիմնախնդրի կարգավորմանը, սակայն գլխավոր դերը մնում է Հայաստանին և Ադրբեջանին. անհրաժեշտ է լուծում գտնել՝ երկու կողմերի շահերից ելնելով՝ «առանց հաղթողների և պարտվողների»:

«Ինչ վերաբերում է Ղարաբաղին... Շատ բարդ հարց, հնացած, արմատացած անցյալում: Երբ այն սրվեց, մենք փորձեցինք օգնել երկու հանրապետություններին, երկու ժողովուրդների համար լուծում գտնել: Դրանից հետո Ռուսաստանն էր փորձում»,- ՌԻԱ «Նովոստի»-ին տված հարցազրույցում ասել է Գորբաչովը, որը ղեկավարում էր ԽՍՀՄ–ը հակամարտության սրման ժամանակ:

Խորհրդային Միության նախկին առաջնորդը վստահ է, որ այժմ, երբ ռազմական գործողություններն ավարտվել են, կարևոր է չկանգնել այդ կետում և խնդիրը չթողնել չլուծված ևս տասնամյակներ:

«Հուսով եմ, որ Ռուսաստանը կկարողանա օգնել, բայց հիմնական դերը հակամարտության կողմերինն է: Հայաստանն ու Ադրբեջանը պարտավորվել են բանակցություններ վարել դրա կարգավորման շուրջ: Որոշումը պետք է բխի երկու կողմերի շահերից ՝ առանց հաղթողների և պարտվողների»,- ասել է Գորբաչովը: