Առանց ԼՂ կարգավիճակի հստակեցման` հակամարտության լուծումը հնարավոր չէ. Ուորլիք

Այսօր` լրագրողների հետ հանդիպման ժամանակ, ԵԱՀԿ ՄԽ ամերիկացի համանախագահ Ջեյմս Ուորլիքը, խոսելով ԼՂ հակամարտության կարգավորման մասին, նախ ասել է, որ իրենց ցանկությունն այն է, որ ամբողջ տարածաշրջանում լինի խաղաղություն, ժողովրդավարություն,  բարեկեցություն:

«Առանց Լեռնային Ղարաբաղի կարգավիճակի հստակեցման` Ղարաբաղյան հակամարտության համապարփակ լուծում հնարավոր չէ»,- հայտարարել է նա՝ հավելելով, որ կարգավիճակի որոշման համար անհրաժեշտ է Լեռնային Ղարաբաղի բնակչության ազատ կամաարտահայտումը:

Ինչ վերաբերում է Ուորլիքի այն աղմկահարույց հայտարարությանը, թե ԼՂ «օկուպացված տարածքները պետք է վերադարձվեն Ադրբեջանին», ապա  նա նշել է, որ նկատի է ունեցել համապարփակ կարգավորման գործոնը, որի բաղադրիչներից մեկը և բանակցությունների առարկան պետք է լինի Լեռնային Ղարաբաղի հարակից տարածքների վերադարձը: