ՏԵՍԱՆՅՈՒԹ․ Առաջին ձեր կարևոր պարտավորությունն է Փաշինյանին պաշտոնանկ անելը․ Արծվիկ Մինասյանը՝ կառավարությանը

ՀՅԴ Հայաստանի Գերագույն մարմնի անդամ Արծվիկ Մինասյանը կառավարության շենքի դիմաց ընթերցեց երդման տեքստը, որը կառավարության անդամները տվել են նախագահի ներկայությամբ՝ հայտնում է Yerkir.am-ը։

«Առաջին ձեր կարևոր պարտավորությունն է կատարել ժողովրդի պահանջը, այն է՝ վարչապետ Նիկոլ Փաշինյանին պաշտոնանկ անել: Երկրորդ պահանջը՝ ինքնիշխանությանը և Հայաստանի շահերին դավաճանած մարդուն հեռացնել պաշտոնից: Կառավարության յուրաքանչյուր անդամ իր համար սա որպես սահմանադրական և օրենքով նախատեսված պահանջ պետք է ընդունի: Եվ դրանից ելնելով, եթե ձեզնից յուրաքանչյուրը չկատարի այս պահանջը, դուք կհամարվեք երդմնազանց, դուք կհամարվեք հայ ժողովրդի թշնամի, հակառակորդ, քանի որ Հայաստանի Հանրապետության անվտանգությանը ամեն վայրկյան սպառնում է կոտորում, կործանում»,-ասաց նա:

Հայաստանի Հանրապետության յուրաքանչյուր քաղաքացու, յուրաքանչյուր մարդու համար այսօր Հայաստանը դարձել է վտանգավոր վայր՝ նշեց Մինասյանը: Դավաճանը, նրա խոսքով, պետք է դատվի։

«Երաշխավորում ենք, որ արդար դատական համակարգով նա կստանա իր արժանի պատիժը: Բայց դրա համար չափազանց կարևոր է, որ ձեզնից յուրաքանչյուրը՝ հանած վարչապետին՝ 14 կառավարության անդամ, եթե ներսում է գտնվում, պատրաստվեք, որպեսզի քվեարկեք պաշտոնանկ անելու համար Հայաստանի Հանրապետության գլխավոր դավաճանին»,-ասաց Արծվիկ Մինասյանը:

Մանրամասն՝ տեսանյութում․