Աֆղանստանում ԱՄՆ ռազմաբազան հրթիռային հարձակման է ենթարկվել

Աֆղանստանում հրթիռային հարձակման է ենթարկվել երկրում ՆԱՏՕ-ի ամենամեծ ավիաբազան՝ Բաղրամը։ Այս մասին հայտնում է Pajwok գործակալությունը՝ հղում անելով Հյուսիսատլանտյան դաշինքի հայտարարությանը:

«Նախնական տվյալներով` զոհեր կամ վիրավորներ չկան, օդանավակայանը չի վնասվել»,- մեջբերում է գործակալությունը Աֆղանստանում ՆԱՏՕ-ի հրահանգիչների և խորհրդականների «Վճռական աջակցություն» առաքելության հայտարարությունը:

Ըստ Pajwok-ի՝ Փարվանի կենտրոնական նահանգում գտնվող Բաղրամ շրջանի վարչակազմի խոսնակն ասել է, որ չորս հրթիռ է արձակվել ԱՄՆ ավիաբազայի ուղղությամբ: Աֆղանստանի ոստիկանությունը կարողացել է կանխել առնվազն ևս վեց արկի արձակումը և տեղում վնասազերծել: