Հունաստանը ֆրանսիական Rafale կործանիչները կստանա հաջորդ տարի

Թուրքիայի հետ խիստ լարվածության մեջ գտնվող Հունաստանը Ֆրանսիայից պատվիրած 18 հատ Rafale կործանիչները կստանա հաջորդ տարի. հայտնում է Euronews-ի թուրքական ծառայությունը։

Երկրի վարչապետ Կիրիակոս Միցոտակիսը խորհրդարանում հայտարարել է, որ ֆրանսիական կառավարության և պաշտպանական ընկերության հետ համաձայնագրերի կնքումը կավարտվի մոտակա օրերին։

Նշենք, որ Թուրքիայի և Հունաստանի հարաբերությունները լարվել էին հունապատկան ջրերում Թուրքիայի ապօրինի գործունեության պատճառով՝ հասնելով անգամ ռազմական հնարավոր բախման։ Բացի այդ՝ Թուրքիայի կողմից Ս-400-ների գնումը Հունաստանին կանգնեցրել է երկինքը պաշտպանելու անհրաժեշտության դեմ։