Ս-500-ի փորձարկումներն ավարտված են, ռուսական զորքերին մատակարարումները կսկսվեն 2021 թվականին

Ռուսական Almaz-Antey ռազմական ընկերությունն ավարտել է վերջին Ս-500  «Պրոմեթևս» զենիթահրթիռային համակարգի փորձարկումները, համալիրի առաքումը զորքերին նախատեսվում է սկսել 2021 թվականից: Արտասահմանյան հաճախորդները նույնպես հետաքրքրություն են ցուցաբերում ռուսական նոր հակաօդային և հակահրթիռային պաշտպանության համակարգի նկատմամբ. հայտնում է Аnna-news-ը՝ վկայակոչելով «Ռոստեկ» պետական կորպորացիայի գլխավոր տնօրեն Սերգեյ Չեմեզովին:

«Ըստ էության՝ Almaz-Antey-ը վաղուց արդեն ավարտել է բոլոր փորձարկումները, այն նախատեսվում է 2021 թվականին»,- ասել է նա:

Ավելի վաղ օդատիեզերական ուժերի զենիթահրթիռային ուժերի պետ, գեներալ-մայոր Սերգեյ Բաբակովը խոսել էր նոր զենիթահրթիռային համակարգի առաջադրանքների մասին:

Նրա խոսքով՝ համալիրի հիմնական խնդիրը միջին հեռահարության բալիստիկ հրթիռների, իսկ անհրաժեշտության դեպքում՝ միջմայրցամաքային բալիստիկ հրթիռների ոչնչացումն է թռիչքային ուղու վերջում: Բացի այդ՝ Ս-500-ն ունակ է ոչնչացնել գերձայնային ինքնաթիռներ, անօդաչու թռչող սարքեր: