Ս-500 «Պրոմեթևս» ՀՕՊ համակարգի ստեղծումը կավարտվի 2021 թվականին

Ս-500 «Պրոմեթևս» զենիթահրթիռային համակարգը, որն աշխարհում նմանօրինակը չունի և կարողանում է ոչնչացնել գերձայնային զենքը մերձավոր տարածքում, 2021 թվականին բոլոր անհրաժեշտ փորձարկումներն ավարտելուց հետո պատրաստ կլինի սերիական արտադրության: Նոյեմբերի 27-ին «Կրասնայա զվեզդա» թերթում այս մասին հայտնել է Ռուսաստանի Դաշնության օդատիեզերական ուժերի գլխավոր հրամանատարի տեղակալ, գեներալ-լեյտենանտ Անդրեյ Յուդինը:

«Հարկ է նշել, որ նախատեսվում է 2021 թվականին ավարտել Ս-500 շարժական օդային և հակահրթիռային պաշտպանության համակարգի ստեղծումը»,- նշել է նա:

Հիշեցնենք, որ Ռուսաստանի Դաշնության պաշտպանության նախարարի տեղակալ Ալեքսեյ Կրիվորուչկոն նախապես հայտարարել էր 2021 թվականին Ռուսաստանի զինված ուժերի կողմից Ս-500 առաջին զենիթահրթիռային համակարգեր ձեռք բերելու, իսկ 2025 թվականին՝ սերիական մատակարարումներ ստանալու հնարավորության մասին:

Ռուսաստանի օդատիեզերական ուժերի հրամանատար Սերգեյ Սուրովիկինը հուլիսին հրատարակությանը տված հարցազրույցում նշել էր, որ Ս-500 համալիրի բնութագրերը թույլ կտան դրանք դասակարգել որպես հակատիեզերական պաշտպանության առաջին սերնդի համակարգեր, և որ այն համարժեքը չունի աշխարհում: