Մեր ցանկությունն է «ամբողջովին մաքրել» Ղարաբաղը. «Գորշ գայլերի» առաջնորդ

Թուրքական ազգայնամոլ–ահաբեկչական «Գորշ գայլեր» կազմակերպության քաղաքական կառույցի՝ «Ազգայնական շարժում» կուսակցության նախագահ Դևլեթ Բահչելին, ելույթ ունենալով իր կուսակցության խորհրդարանական խմբակցության նիստում, ասել է, որ ինքն անվերապահորեն պաշտպանում է Ադրբեջան զորք մտցնելու մասին օրինագիծը. հայտնում է T24.com.tr կայքը:

«Օգտվելով առիթից` ուզում եմ մեկ անգամ ևս ասել, որ մենք լիովին կաջակցենք Ադրբեջանին, որը 44 օրվա ընթացքում կարողացավ ազատագրել 28 տարի առաջ օկուպացված իր հողերի 70%-ը: Մենք ուզում ենք, որ Լեռնային Ղարաբաղն ամբողջությամբ «մաքրվի», որպեսզի զավթիչը՝ Հայաստանը, վտարվի հայրենիքի յուրաքանչյուր թիզից: Նոյեմբերի 10-ի պատմական զինադադարի որոշ տեխնիկական հարցերի վերաբերյալ հակասություններն ու քննադատությունները չեն կարող ստվերել այս գործողության հսկայական ռազմավարական նշանակությունը», - ասել է Էրդողանի հետ կոալիցիա կազմած Բահչելին:

Նա նաև անդրադարձել է Կիպրոսին՝ հայտարարելով, որ կղզու հիմքը թյուրքականությունն է։ «Կիպրոսը թուրքական հայրենիք է. թուրքերի՝ այնտեղ մնալը պատմական ինքնասիրության հարց է։ Կիպրոսը մեզ համար ազգային հարց է... ՀԿԹՀ անկախությունը համազոր է Թուրքիայի անկախությանը», – նշել է թուրք ազգայնամոլ գործիչը։

Հիշեցնենք, որ թուրքական խորհրդարանական «İYİ» կուսակցության («Լավ») մամուլի քարտուղար և պատգամավոր  Յավուզ Աղրալիօղլուն թվիթերյան իր էջում, ի շարս թուրք այլ գործիչների, նույնպես բացահայտ նշել էր. «Ես ողջունում եմ նրանց, ովքեր Ղարաբաղում կախել են թուրքական դրոշը: Փառք Ամենակարողին, 30-ամյա օկուպացիան ավարտվեց: Սա թուրքերի հաղթանակն է: Հաջորդը Արևելյան Թուրքեստանը, Ղրիմը, Քիրքուքն են»։