Թուրք ազգի հետ կատակ չեն անում. «գորշ գայլերի» առաջնորդ

Ռեջեփ Թայիփ Էրդողանի հետ կոալիցիա կազմած «գորշ գայլերի» քաղաքական միավորման՝ «Ազգայնական շարժում» կուսակցության առաջնորդ Դևլեթ Բահչելին անդրադարձել է Միջերկրականի արևելյան ջրերում Հունաստանի հետ աճող լարվածությանը՝ կապված թուրքական որոնողական աշխատանքների և բացառիկ տնտեսական գոտիների սահմանազատման հետ։

Բահչելին օրերս Հունաստանի և Եգիպտոսի միջև Միջերկրականում բացառիկ տնտեսական գոտիների սահմանազատման վերաբերյալ կնքված պայմանագիրն անվանել է «անբարոյական խաբեություն»։

Բահչելին Հունաստանի գործողություններն անվանել է թշնամական և սպառնացել է, որ «թուրք ազգը գիտի, թե ինչպես վարվել թշնամու հետ»։

«Թուրք ազգի հետ կատակ չեն անում։ Մեր ոտքի տակ ընկնողի վերջաբանը ճզմվելն է», - նշել է ազգայնական գործիչը։