Ֆրանսիան հետաձգել Է ՌԴ-ի հետ բարձր մակարդակի հանդիպումները. պատճառը Նավալնիի գործն է

Պաշտոնական Փարիզը հետաձգել է սեպտեմբերի 14-ին նախատեսված ֆրանս-ռուսական հանդիպումը՝ արտգործնախարարների և պաշտպանության նախարարների մակարդակով: Այս մասին գրում է ՏԱՍՍ-ը՝ Ֆրանսիայի ԱԳՆ-ին հղումով:

ԱԳՆ հայտարարությունում, մասնավորապես, նշվում է. «Հաշվի առնելով առկա իրավիճակը՝ ռուսական կողմի հետ կարծիքներ փոխանակելուց հետո որոշում կայացրեցինք հետաձգել ֆրանս-ռուսական անվտանգության խորհրդի նիստը»:

Հիշեցնենք՝ ՌԴ և Ֆրանսիայի արտաքին քաղաքականության ու պաշտպանության գերատեսչությունների ղեկավարների խորհրդակցությունների  «2+2» ձևաչափը ստեղծվել է դեռևս 2002 թ.՝ նախագահներ Վլադիմիր Պուտինի և Ժակ Շիրակի նախաձեռնությամբ: Նման վերջին հանդիպումը, որը նվիրված էր անվտանգության խնդիրներին, մասնավորապես` միջին և փոքր հեռահարության հրթիռների խնդրին, Սիրիայում ահաբեկչության դեմ պայքարին ու Ուկրաինայի հակամարտության կարգավորմանը, անցկացվել էր Մոսկվայում 2019 թվականի սեպտեմբերի 9-ին: