Փաշինյանը խոսում է ՌԴ-ի հետ բարձր մակարդակի կապերի մասին, հետո ՀԿԵ-ի եւ «Գազպրոմի» գործունեության հետաքննություն է սկսվում

Ռուսաստանի և Հայաստանի միջև հարաբերություններում առաջնային է վստահության հարցը: Այս մասին Երևանում անցկացվող «Լազարյան» ակումբի նիստում ասաց Պետդումայի ԱՊՀ եւ հայրենակիցների հետ կապերի հարցերով կոմիտեի նախագահի առաջին տեղակալ Կոնստանտին Զատուլինը՝ նշելով, որ հարցն առաջնային է դարձել Ռուսաստանի և Հայաստանի նոր ղեկավարության միջև: «Եթե ինչ-ինչ պատճառներով վստահությունը խախտվել է, ապա Ռուսաստանում այլ իրավիճակ է ստեղծվում, որտեղ կան Ադրբեջանի հետ հարաբերությունները խորացնելու կողմնակիցներ, ընդ որում՝ ոչ միայն ռազմատեխնիկական ոլորտում: Ադրբեջանն էլ է  շահագրգռված է ՌԴ-ի հետ հարաբերությունների զարգացմամբ»,- հավելեց նա:

Զատուլինն ընդգծեց, որ չնայած վարչապետի պաշտոնակատարի հայտարարություններին, թե Հայաստանի եւ Ռուսաստանի հարաբերությունները երբեւէ այսքան արդյունավետ չեն եղել, գործնականում այլ իրավիճակ է: «Այս հայտարարություններից հետո սկսվում է ՀԿԵ-ի և  «Գազպրոմի» գործունեության հետաքննություն, հետո հաջորդում են ներդրումների մասին հայտարարություններ», - նշեց նա:

Ըստ Զատուլինի` ռուսական կողմի համար, որը ոչ մի կերպ չի ցանկանում միջամտել Հայաստանի գործերին, կարեւոր է, որ հայ ժողովուրդը միասնական լինի, այլ ոչ թե բաժանված եւ քաղաքական «ռազբորկաների» մեջ ընկղմված: