Եթե չափահաս քաղաքացիները տուգանվելու մատերիալ են, ապա նրանց զավակները՝ փող լվանալու մատերիալ․ Աղասի Ենոքյան

«Մեդիա պաշտպան» նախաձեռնույան ղեկավար Աղասի Ենոքյանը գրում է. 

«Եվ ուրեմն, դպրոցներում դասերը լինելու են կիսատ-պռատ, այնքան կիսատ-պռատ, որ աշակերտները ոչինչ չեն կարողանալու սովորել։

Աշակերտները լինելու են դիմակներով։

Դասերը սկսվելու են ուստարվա կեսից, մի կեսն էլ արձակուրդ է լինելու։ Դասերը կրճատված սկզբունքով են, շաբաթը՝ 3 օր։ Աշակերտները գրատախտակի մոտ չեն գնալու դաս պատասխանելու, միջանցք չեն դուրս գալու, բուֆետ չեն գնալու։

Պարզ է, որ այս պայմաններում ոչ թե լավ չեն սովորելու, այլ ընդհանրապես դաս չեն սովորելու։

Եվ ուրեմն, ինչո՞ւ կազմակերպել այսպիսի ուսուցում, որից ուսուցանվողներին ոչ մի օգուտ չկա», գրել է Աղասի Ենոքյանը։

Պատասխանը, նրա խոսքով, իմանում ենք ՀՀ կառավարության նիստի սեպտեմբերի 3-ի առանց զեկուցման եւ քննարկման ընդունված որոշումից։

«Այնտեղ որոշակի այլաբանությամբ գրված է, որ միայն սեպտեմբեր ամսին, միայն 15 օրվա համար կառավարությունը «Տավուշ տեքստիլից» գնում է 650 միլիոն դրամի դիմակներ։ Իսկ աշակերտները դպրոց են գնալու ոչ թե սովորելու, այլ այդ դիմակները կրելու համար։

Եվ ուրեմն, եթե չափահաս քաղաքացիները տուգանվելու համար են մատերիալ, ապա նրանց զավակները մատերիալ են դիմակի վրա փող լվանալու համար»։