Գիտեինք, որ ստորագրությունների թվի հետ կապված խնդիրներ կարող են առաջանալ, ՍԴ դիմելը մեր քաղաքական դիրքորոշման վերահաստատումն էր․ Արման Աբովյան

Սահմանադրական դատարանի կողմից ԲՀԿ-ի դիմումը վարույթ չընդունելը կուսակցության համար անակնկալ չէր. Yerkir.am-ի թղթակցի հետ զրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը։

«Ուզում եմ հատուկ ընդգծել՝ ի սկզբանե մենք գիտեինք, որ ստորագրությունների թվի հետ կապված  խնդիրներ կարող են առաջանալ։ Մեզ համար ՍԴ դիմելը մեր քաղաքական դիրքորոշման վերահաստատումն էր, և մենք գիտակցում էինք, որ ստորագրությունների պակաս կար, ու հետ կվերադարձվի»,- ասաց Արման Աբովյանը։

Միևնույն ժամանակ նա ընդգծեց, որ այս պահին, ՍԴ համապատասխան բոլոր նորմերով, մուտքագրված է նույնաբովանդակ երկրորդ դիմումը։

«Նույնաբովանդակ դիմում երկրորդ անգամ ուղարկել ենք մոտ երկու շաբաթ առաջ՝ ԼՀԿ-ի հետ համատեղ, որում բոլոր սահմանադրական նորմերը պահպանված են», - հավելեց բանախոսը։

Հիշեցնենք՝ ԲՀԿ-ն ՍԴ-ում բողոքարկել էր սահմանադրական փոփոխությունները, որոնց համաձայն՝ Հրայր Թովմասյանը պետք է թողնի ՍԴ նախագահի պաշտոնը։ Փոփոխությունների համաձայն՝ դադարեցվում են նաև 12 տարի պաշտոնավարած դատավորների լիազորությունները։ Խոսքը, մասնավորապես, դատավորներ Ալվինա Գյուլումյանի, Ֆելիքս Թոխյանի ու Հրանտ Նազարյանի մասին է։

Նշենք, որ ՍԴ-ի կողմից ԲՀԿ-ի դիմումը վարույթ չի ընդունվել ստորագրությունների քանակի պատճառով։ Պակասել է մեկ ստորագրություն։ ՍԴ դիմելու համար անհրաժեշտ է պատգամավորների թվի առնվազն 1/5-ի համաձայնությունը։ ԲՀԿ-ն դիմել էր 26 պատգամավորի ստորագրությամբ։