«Ֆրեսկոն» այս տարի կմեկնարկի Բերդ քաղաքում Բերդ պարային անսամբլի մենահամերգով

«Ֆրեսկո» արդի արվեստի և հոգևոր ֆիլմերի 7-րդ միջազգային փառատոն այս տարի կմեկնարկի օգոստոսի 22-ից սեպտեմբերի 1-ը: Կազմակերպիչները խոստանում են 11 օր փառատոնի շրջանակում ստեղծել  իսկական տոն՝ պահպանելով համավարակի կանխարգելման կանոնները:

Այս տարի «Ֆրեսկոյի» մեկնարկը կտրվի սահմանամերձ գեղատեսիլ Բերդ քաղաքում՝ Բերդ պարային անսամբլի բացօթյա մենահամերգով, այնուհետև համերգին կհաջորդեն միջազգային ֆիլմերի դիտումները:

Իսկ արդեն երևանյան ծրագիրը կմեկնարկի օգոստոսի 24-ից և կշարունակվի մինչև սեպտեմբերի 1-ը հենց Երևանի սրտում՝ Աբովյան փողոցի Սբ. Աննա և Սբ. Կաթողիկե եկեղեցիների հարակից տարածքում: Ծրագրում կներառվեն ֆիլմերի  դիտում-քննարկումներ, համերգային ծրագրեր և առցանց հանդիպումներ: Այս տարի ներկայացված 3000-ից ավել հայտից  (85 երկիր) ընտրվել է 63 ֆիլմ (23 երկիր): Մրցութային ծրագրում ընդգրկվել են ֆիլմեր, որոնց ուղերձներն են մարդասիրությունը, հայրենասիրությունը, առողջ ապրելակերպը և այլ համամարդկային արժեքներ:

Փառատոնի ընթացքում կլինեն սպասված համերգներ՝  օգոստոսի 28-ին՝ Հայաստանի Պարի պետական անսամբլի մենահամերգ, 29-ին՝ Ռուբեն Հախվերդյանի 70-ամյակին նվիրված հոբելյանական համերգ, օգոստոսի 30-ին՝  Ջիվան Գասպարյան և ընկերներ:

Փառատոնի նպատակն է հոգևոր և մշակութային երկխոսության միջոցով նպաստել մարդասիրական արժեքների տարածմանը:

Փառատոնն իրականացվում է Մայր Աթոռ Սուրբ Էջմիածնի օրհնությամբ և աջակցությամբ, ՀՀ կրթության, գիտության, մշակույթի և սպորտի նախարարության գլխավոր աջակցությամբ և Հայաստանյան Կլոր սեղան հիմնադրամի աջակցությամբ: