ԵՄ ղեկավար կազմը համաձայնեցրել է 2021-2027 թթ բյուջեն

Եվրամիության երկրների ու կառավարությունների ղեկավարները համաձայնության են հասել 2021-27 թթ բյուջեի և կորոնավիրուսային համավարակից հետո տնտեսության վերականգնման պլանի շուրջ. այս մասին իր թվիթերյան պաշտոնական էջում հայտարարել է Եվրոպական խորհրդի նախագահ Շառլ Միշելը՝ Բրյուսելում գագաթնաժողովի ավարտից հետո, որը ձգձգվել է 4 օր՝ նախատեսված 2 օրվա փոխարեն։

Նա, մասնավորապես, նշել է. «Գործարքը կայացավ»։ 

Բացի այդ՝ համաձայնագիրը մեկնաբանել է նաև Ֆրանսիայի նախագահ էմանուել Մակրոնը, նշելով՝  «Պատմական օր Եվրոպայի համար»։

Միևնույն ժամանակ Բելգիայի վարչապետ Սոֆի Վիլմեսը հաստատել է, որ գագաթնաժողովի մասնակիցները համաձայնեցրել են 1․074 տրիլիոն եվրոյի չափով 7-ամյա բյուջետային պլանի փոխզիջումային տարբերակ և 750 մլրդ եվրոյի արտաբյուջետաին ֆինանսավորման ծավալ։

Ակնկալվում է, որ այդ միջոցները կտրամադրվեն Եվրահանձնաժողովի կողմից մինչև 2026 թվականը՝ վարկերի տեսքով։

Գումարը պլանավորվում է մարել մինչև 2058 թվականի դեկտեմբերի 31-ը։