ՏԵՍԱՆՅՈՒԹ․ Մի ջղայնացեք մեզ վրա․ Ալեն Սիմոնյանը՝ Արցախում անդիմակ խնջույքի մասին

Արցախի նորընտիր նախագահ Արայիկ Հարությունյանի պաշտոնի ստանձնումը շնորհավորելիս՝ երկու հանրապետությունների բարձրաստիճան պաշտոնյաների անդիմակ ու առանց սոցիալական հեռավորության լուսանկարը տարածող և պաշտոնյաների վարքագիծը քննադատողներին Արցախից ուղիղ եթերով պատասխանել է ԱԺ փոխնախագահ Ալեն Սիմոնյանը՝ հայտնում է Yerkir.am-ը։

Նա պատճառաբանել է, որ իրենք Արցախում են, որտեղ, ըստ նրա, գործում է այլ իրավական ռեժիմ և պարետատան այլ ցուցումներ։

«Շատ է քննարկվում, որ մենք կոչով ենք հանդես գալիս և ինքներս դրան չենք հետևում․ լուսանկարը արված է Արցախի Հանրապետությունում, որտեղ գործում է այլ իրավական ռեժիմ և պարետի ցուցումների, ինչպես նաև իրավիճակի կտրուկ տարբերություն կա»,-ասել է նա։

Նա նշել է, որ Արցախի Հանրապետությունում և Հայստանի Հանրապետությունում թվերը բավականին տարբեր են։

Այն լուսանկարը, որը տարածվում է համացանցում, արված է բաց տարածքում, Արցախի Հանրապետությունում գործող կարգին համապատասխան, այսինքն նման խիստ սահմանափակումներ, որոնք գործում են ՀՀ-ում, ԱՀ-ում, բարեբախտաբար, չկան՝ ասել է նա ու ՀՀ քաղաքացիներին կոչ արել կրել դիմակներ և պահօանել հեռավորություն, քանի որ վտանգը շարունակում է առկա լինել։

«Լավ եղեք, մի ջղայնացեք մեզ վրա»,-եզրափակել է Ալեն Սիմոնյանը։

Հ.Գ. Չնայած Ալեն Սիմոնյանի հավաստիացումներին և արդարացումներին, այդուհանդերձ, ԱՀ պարետի՝ ստորև ներկայացվող որոշմամբ գործող սահմանափակումներն ամենևին չեն համընկնում ՀՀ ԱԺ փոխնախագահի ասածների հետ և խոսում են դեռևս ուժի մեջ գտնվող և կոնկրետ կիրառման ենթակա սահմանափակումների մասին:

Մանրամասն՝ տեսանյութում։