Ձեզ պահեք ու ավելի լավ է` չմիջամտեք. Իրանը հրաժարվել է ԱՄՆ-ի առաջարկած ԹԱՕ սարքերից

Իրանը հրաժարվել է ԱՄՆ նախագահ Դոնալդ Թրամփի առաջարկած` թոքերի արհեստական օդափոխման սարքերից: Այդ մասին, ըստ EADaily-ի, իր թվիթերյան էջում գրել է Իսլամական Հանրապետության արտգործնախարար Մոհամադ Ջավադ Զարիֆը. տեղեկացնում է Yerkir.am-ը:

Նա ընդգծել է, որ Իրանն ինքը  մի քանի ամսից կսկսի ԹԱՕ սարքեր արտահանել:

«Այն, ինչ պիտի անեք, այլ երկրների գործերին միջամտելը դադարեցնել է, հատկապես` իմ ժողովրդի գործերին»,- Թրամփին դիմելով` ասել է Զարիֆը:

Ապրիլի 18-ին Սպիտակ տանը կազմակերպված մամուլի ասուլիսում Դոնալդ Թրամփն ասել էր, որ եթե Իրանը խնդրի, ԱՄՆ-ը կօգնի բժշկական սարքավորումներով: «Ես նրանց օգնություն եմ առաջարկել, եթե դրա կարիքը լինի: Եթե անհրաժեշտ են ԹԱՕ սարքեր, իսկ դրանք նրանց անհրաժեշտ են, ես կուղարկեմ այդ սարքերը: Մենք  հազարավոր ազատ սարքեր ունենք»,- ասել էր նա: