Ամուսնություն համավարակի ժամանակ. ԱՄԷ-ում ճարը գտել են

Արաբական Միացյալ Էմիրություններում գործարկվել է ամուսնությունների առցանց գրանցման ծառայություն, որը հնարավորություն է տալիս զույգերին կորոնավիրուսի համավարակի պայմաններում պետականորեն գրանցելու իրենց ամուսնությունը: Այդ մասին, ըստ yerkir.am-ի, հայտնում է Middle East Eye կայքը:

Կիրակի ԱՄԷ արդարադատությւան նախարարությունը հայտարարել է, որ երկրի քաղաքացիները և Պարսից ծոցում արաբական թագավորության ոչ ռեզիդենտները կարող են ամուսնության առցանց արարողության ամսաթիվ նշանակել և այն իրականացնել տեսակապի միջոցով` հոգևորականի մասնակցությամբ, որից հետո փաստաթղթերը կներկայացվեն համապատասխան պետական մարմիններին ու կհաստատվեն:  Արարողության ընթացքում հոգևորականը հաստատում է  ամուսինների անձը, հետո ամուսնության վկայականը փոխանցվում է ԱՄԷ մասնագիտացված դատարան` հետագա ստուգման համար: Ամուսնական զույգն ամուսնության հաստատված վկայականը ստանում է տեքստային հաղորդագրության միջոցով:

Այս որոշումը հաջորդել է Դուբայի` յոթ էմիրություններից մեկի իշխանությունների հայտարարությանը, որ ժամանակավորապես դադարեցնում են ամուսնությունների և ամուսնալուծությունների գրանցումը էմիրությունում:

Վերջին տվյալների համաձայն` ԱՄԷ-ում կորոնավիրուսով վարակվել է 4123 մարդ, 22 մարդ մահացել է: