Քաղաքացիների մասնակցությունն առաջիկա տոներին ու հիշատակի օրերին կսահմանափակվի. վարչապետ

Առաջիկայում ունենք մեզ համար սրբազան տոներ եւ հիշատակի օրեր` ապրիլի 24-ն է, նաեւ մայիսի առաջին տասնօրյակում՝ Շուշիի ազատագրման օրը եւ Հայրենական մեծ պատերազմում տարած հաղթանակի օրը:  Այդ միջոցառումները կսահմանափակվեն. ֆեսյբուքյան ուղիղ եթերում ասաց ՀՀ վարչապետ Նիկոլ Փաշինյանը:

«Քաղաքացիների մասնակցությունը որեւէ միջոցառման պետք է սահմանափակվի, որովհետեւ եթե թույլ տանք այդ միջոցառումները` սովորական ընթացակարգով, կունենանք համաճարակի անվերահսկելի բռնկում: Ապրիլի  24-ին տեղի կունենան միայն արարողակարգային միջոցառումներ, այսինքն` այն պաշտոնյաները, որոնք ունեն արարողակարգային անելիք, կիրականացնեն դա: Նույնը վերաբերում է նաեւ մայիսի 8-ին եւ 9-ին: Բնականաբար, մայիսի 1-ին էլ զանգվածային միջոցառումներ չեն լինի»,- նշեց նա՝ կոչ անելով ըմբռնումով մոտենալ այս որոշումներին:

«Ուզում եմ շնորհակալություն հայտնել, որ Հայ առաքելական եկեղեցուն ըմբռնումով է մոտենում այս իրավիճակին եւ առաջիկա Սուրբ Զատկի միջոցառումները տեղի են ունենալու դռնփակ ռեժիմով: Եկեղեցին նույնպես կոչ է արել, որպեսզի քաղաքացիները ներկա չլինեն զանգվածային միջոցառումների»,- ասաց Փաշինյանը:

Հիշեցնենք, որ ավելի վաղ կառավարությունում տեղի է ունեցել Հայաստանի Հանրապետությունում կորոնավիրուսի տարածումը կանխարգելող աշխատանքները համակարգող հանձնաժողովի նիստ, որի ընթացքում վարչապետը հանձնարարել է ներկայացնել Արտակարգ դրության ռեժիմի երկարաձգման կառավարության որոշման նախագիծ, որի ընդունմամբ Սահմանադրության ուժով կգումարվի Ազգային ժողովի հատուկ նիստ: