Պենտագոնը կվճարի Ռուսաստանում, Իրանում և այլ երկրներում նավթի պաշարների մասին տեղեկատվության համար

ԱՄՆ պաշտպանության նախարարությունը մրցույթ է հայտարարել՝ ակնկալելով ստանալ նավթ արտահանող ու ներկրող հիմնական երկրների նավթային պաշարների մասին տվյալներ: Պենտագոնը նշում է, որ կցանկանար ավելի լայն տեղեկություններ ունենալ նավթի համաշխարհային պաշարների վերաբերյալ՝ հետևելով հումքի տեղափոխմանը, գներին ու առևտրի միտումներին. ըստ yerkir.am-ի՝ տեղեկացնում է EADaily-ն:

ԱՄՆ երկրատարածական հետախուզության ազգային գործակալության հայտարարած մրցույթով՝ կապալառուն իրականացնելու է աշխարհի 22,8 հազար պահեստարաններում նավթի ու նավթանյութերի պաշարների մոնիթորինգ: Տվյալների բազայում անպայման պետք է լինեն Անգոլան, Բրազիլիան, Չինաստանը, Իրանը, Ռուսաստանը, Սաուդյան Արաբիան և Վենեսուելան:

Մրցույթի անցկացման մասին տեղեկությունը տեղադրված է Սպիտակ տան՝ գնումների հայտարարման մասին կայքում՝ sam.gov:

Մրցույթում հաղթողը տեղեկությունները պետք է ստանա էլեկտրաօպտիկական պատկերների, ռադարների և այլ ժամանակակից սարքավորումների միջոցով: Տվյալների ճշգրտությունը պետք է լինի 85 տոկոսից ոչ պակաս: Մոնիթորինգի ժամկետն առայժմ մեկ տարի է, սակայն կարող է երկարաձգվել ամեն տարի՝ 5 տարվա ընթացքում:

Բացի դրանից՝ կապալառուն պետք է տեղեկացնի նոր պահեստանների ի հայտ գալու, հների փակման, գործողներում նավթի պարունակության փոփոխության մասին, ընդ որում՝ պահանջվում են ոչ թե մոտավոր, այլ կոնկրետ ծավալներ:

Մրցույթի տեխնիկական փաստաթղթերում ասվում է, որ տեղեկատվությունը գաղտնի չի լինի: Դա նշանակում է, որ այլ երկրների պահեստարաններում նավթի պաշարների մասին տվյալները կարող են  կիրառել ինչպես ԱՄՆ իշխանությունները, այնպես էլ ամերիկյան նավթագազային ընկերությունները: Պենտագոնն էլ պետության հաշվին կլուծի արդյունաբերական լրտեսության խնդիրները: