Սերժ Սարգսյանի ու Նիկոլ Փաշինյանի վարած ներդրումային քաղաքականությունն իրար շատ մոտ են՝ համարյա եղբայրներ են. Հրանտ Բագրատյան

Գործող իշխանությունները պահպանում են տնտեսական աճի կայունությունը ճիշտ այնպես, ինչպես Սերժ Սարգսյանը՝ ըստ Yerkir.am-ի, ասել է տնտեսագետ Հրանտ Բագրատյանը:

«Երբ 90-ականներին անցում կատարվեց շուկայական տնտեսության, հաջորդը պետք է լիներ ինստիտուցիոնալ փոփոխությունը: Հայաստանի երկրորդ նախագահը տնտեսական աճ ապահովեց դրա հաշվին, դա նորմալ էր»,-հավաստիացրել է տնտեսագետ Բագրատյանը:

Ըստ նրա՝ հենց Ռոբերտ Քոչարյանի պաշտոնավարման տարիներին էր, որ տնտեսությունը վերականգնվեց, սպառման ծավալներն ավելացան: 2008թ.-ին Հայաստանում արձանագրված ճգնաժամը տնտեսության ոլորտում 15 տոկոս անկում գրանցեց: Հենց այդ ժամանակ տնտեսությունը ռեստարտ անելու անհրաժեշություն կար՝ պնդում է մասնագետը:

«Պետք էր անցում կատարել ներդրումային քաղաքականության: Հայաստանի երկրորդ և երրորդ նախագահները կարծում էին ներդրումներ ապահովելու համար բավարար է խոշոր տղեքի հետ պայմանավորվելը: Այս կառավարությունը հասկացնել է տալիս՝ մտադրություն չունի փոխել տնտեսության կառավարման՝ նախկիններից իրեն փոխանցված մոդելը»,- նշել է Բագրատյանը:

Ըստ նրա՝ Սերժ Սարգսյանն ու Նիկոլ Փաշինյանը, վարած ներդրումային քաղաքանակնության տեսանկյունից, իրար շատ մոտ են՝ համարյա եղբայրներ: Ոչ մի լուրջ գնաճ չկա, առանց որի տնտեսական աճ ևս լինել չի կարող:

«Իրենք սարսափում են գնաճից, որովհետև երկուսի քաղաքականությունն էլ պոպուլիզմ է: Մենք չենք կարող էդպես առաջ գնալ: Չենք կարողանում ներդրումային որևէ քայլ կատարել»,-համոզված է տնտեսագետը: