Ամանորին ընդառաջ՝ պարոն Աշոտյանին մաղթում եմ լիքը սեր. Էդմոն Մարուքյան

Դեռևս շարունակվում է Աշոտյան-Մարուքյան «առցանց լեզվակռիվը»։ 

«Լուսավոր Հայաստան» խմբակցության ղեկավար Էդմոն Մարուքյանն, ըստ Yerkir.am-ի, ֆեյսբուքյան իր էջում տարածել է ՀՀԿ-ական նախկին պատգամավոր Արմեն Աշոտյանի՝ իր հասցեին արված արտահայտություններից մեկն ու կից նշել.

«Կարծես թե, Արմեն Աշոտյանը սիրո և ուշադրության պակաս ունի։ Իշխանությունը կորցնելուց հետո սիրող ու փաղաքշող շեֆեր, օգնականներ, տեղակալներ և ինչու չէ նաև երիտհանրապետականներ այլևս չկան։ Այլ բացատրություն պարզապես չկա, հակառակ պարագայում նա չէր փորձի խծկվել լեգիտիմ ընդդիմության և լեգիտիմ իշխանության սիրո և ատելության սագայի մեջ։

Ամանորին ընդառաջ՝ պարոն Աշոտյանին մաղթում եմ լիքը սեր, ուշադրություն և վճռական կամք իր մոլորված ու անորոշ տեղը ճշգրտելու համար»։

Հիշեցնենք, որ Աշոտյանն ավելի վաղ գրել էր.

«Էդմոն Մարուքյանը վերջերս այնքան հաճախ է կրկնում, որ ինձ չի սիրում, որ ես սկսում են անհանգստանալ իր հոգեբանական առողջության համար։

Եթե այդ հնդկական սերիալի նպատակը Փաշինյանին ինչ-որ բանում համոզելն է, կամ հին պատմությունները ջրելը, ապա օգնեմ իրեն.

-Նիկոլ, լսու՞մ ես։ Էդմոնը ԻՆՁ չի սիրում։ Էդմոնը ՔԵԶ է սիրում»։

Ավելի վաղ Մարուքյանը նշել էր.

«Աշոտյա՛ն, դու սիրելու բան չես, սո՛ւս մնա»: