Եգիպտոսում հայտնաբերվել է Ռամզես Բ-ի հազվագյուտ արձանը

Եգիպտացի հնագետները Գիզայի Միթ Ռահինայի շրջանում՝ հինեգիպտական Փթահ աստծու տաճարից ոչ հեռու հայտնաբերել են Ռամզես Երկրորդ փարավոնի արձանի վերին մասը. ըստ Yerkir.am-ի՝ հայտնում է ՌԻԱ «Նովոստի»-ն՝ վկայակոչելով հնության հուշարձանների գործերի նախարարության հաղորդագրությունը:

«Հայտնաբերվել է Ռամզես Երկրորդի՝ վարդագույն գրանիտից հազվագյուտ արձանի վերին մասը»,- վստահեցրել է Եգիպտոսի հնությունների գործերի բարձրագույն խորհրդի գլխավոր քարտուղար Մուստաֆա Վազիրին:

Նշվում է՝ արձանի գտնված ֆրագմենտի բարձրությունը կազմում Է 105 սանտիմետր, իսկ լայնությունը՝ 55 սանտիմետր: Փարավոնի արձանը հաջողվել է գտնել մասնավոր տարածքում, որի տերը գաղտնի պեղումներ էր կատարում, բայց զբոսաշրջային ոստիկանության կողմից ձերբակալվել է դեկտեմբերի սկզբին: Այս պահին գտածոն ուղարկվել է մոտակա թանգարան բաց երկնքի տակ, որտեղ կվերականգնվի:

Ըստ զանազան պատմական աղբյուրների՝ Ռամզես Երկրորդ փարավոնը (մ.թ.ա 1279 – 1213 թթ) Եգիպտոսը գերտերություն է դարձրել իր հաղթանակների, նվաճումների, նոր տարածքների յուրացման, շինարարության, ինչպես նաև ոռոգման բնագավառում հաջողությունների շնորհիվ: