Սենատոր Մենենդեսը կոչ է արել ճանաչել Հայոց ցեղասպանությունը

ԱՄՆ Սենատի միջազգային հարաբերությունների հանձնաժողովի անդամ Ռոբերտ Մենենդեսը Սենատում ունեցած իր ելույթում քննադատել է Թուրքիայի հարձակումները Սիրիայի քրդերի վրա և, ընդհանրապես, տարածաշրջանում նրա անթույլատրելի վարքագիծը. Yerkir.am-ի տեղեկացմամբ՝ հայտնում է ԱՄՆ Հայ դատի հանձնախումբը:

Սենատորը հայտարարել է, որ Սենատը պետք է ընդունի Հայոց ցեղասպանությունը ճանաչող բանաձևը՝ հետևելով Ներկայացուցիչների պալատի օրինակին:

Միևնույն ժամանակ, հանձնաժողովի անդամը հիշեցրել է Վաշինգտոնում Էրդողանի թիկնապահների հարձակումը խաղաղ ցուցարարների վրա՝  հավելելով, որ Ներկայացուցիչների պալատի կողմից Հայոց ցեղասպանության բանաձևի ընդունումից հետո Թուրքիան ջանք չի խնայում նման բանաձևի ընդունումը Սենատում արգելելու համար: Ըստ նրա՝ Անկարան տեղյակ է, որ եթե բանաձևը քվեարկության դրվի, ապա կընդունվի:

Մենեդեսն ընդգծել է, որ Սենատը պետք է տեղի չտա թուրքական ճնշումներին և անհապաղ ճանաչի Հայոց ցեղասպանությունը: