Ի՞նչ է նշանակում՝ զուգընկերներով ընտանիք, ԲՀԿ-ն կտրականապես դեմ է կոնվենցիայի վավերացմանը. Գևորգ Պետրոսյան

Ազգային ժողովում, Եվրախորհրդի բարձրաստիճան ներկայացուցիչների մասնակցությամբ, այս պահին փակ ձևաչափով  քննարկվում է Ստամբուլյան կոնվենցիան:  Yerkir.am-ի թղթակիցը ԱԺ բակից տեղեկացնում է, որ, քննարկմանը զուգահեռ, խորհրդարանի բակում բողոքի ակցիաներ են։ Ակցիաներից մեկն իրականացնում է Հայկական արժեքների պաշտպանության «Կամք» հասարակական նախաձեռնությունը։ Մյուս ակցիան նախաձեռնել է բլոգեր Նարեկ Սարգսյանը։

ՀՀ ԱԺ ԲՀԿ խմբակցության պատգամավոր Գևորգ Պետրոսյանը լրագրողի հարցին, թե ի՞նչ է մտածում կոնվենցիայի վավերացման մասին,  պատասխանեց՝ միացել է կոնվենցիայի վավերացման դեմ ԱԺ բակում կազմակերպված ստորագրահավաքին: Նա շեշտեց՝ Ստամբուլյան կոնվենցիայի վավերացումը հակասում է ՀՀ Սահմանադրությանը և մեր ազգային արժեհամակարգին:

Լրագրողի հարցին, թե, 2018 թվականի տվյալներով, կանանց դեմ իրականացված ընտանեկան բռնությունների փաստերով ՀՀ-ում 400–ից ավելի  քրեական գործեր են քննվել, ԱԺ պատգամավորը պատասխանեց՝  ՀՀ-ն  ունի  ընտանեկան բռնությունը պատժող օրենդրություն և դրա անվան տակ չի կարելի վավերացնել մի բան, որն, ըստ էության, ուղղված է մեր ազգային արժեհամակարգը կործանելուն:

«Ստամբուլյան կոնվենցիայի վավերացման նպատակը ոչ թե  Հայաստանում ընտանեկան բռնության կանխարգելումն է, այլ, կրկնում եմ, այդ անվան տակ Հայաստանում այլ բարքեր ներմուծելը,  որին «Բարգավաճ Հայաստան» կուսակցությունը կտրականապես դեմ է: Ի՞նչ է նշանակում՝ օրինակ, զուգընկերներով ընտանիք: Բոլորս մեծացել ենք ավանդական ընտանիքներում և պարտավոր ենք մեր երեխաներին ու սերունդներին ժառանգել այդպիսի արժեքներով ընտանիք»,- ասաց Գևորգ Պետրոսյանը: