Միայն ուժի դիրքերից է հնարավոր զսպել ԱՄՆ-ին. Կարեն Խանլարեան

Միայն ուժի դիրքերից պետք է խոսել ԱՄՆ-ի հետ, քանի որ փորձը ցույց է տւել, որ միայն այդպես է հնարավոր զսպել այդ երկրին: Այս մասին «Ֆարս» լրատվական գործակալության հետ զրույցում ասել է Իրանի Իսլ. խորհրդարանում Թեհրանի եւ հյուսիսային իրանահայության պատգամավոր դոկտ. Կարեն Խանլարեանը:

«Իրանի ԱԳ նախարարի դեմ պատժամիջոցների սահմանումը վկայում է Թրամփի եւ ԱՄՆ իշխանությունների դիվանագիտական տկարության մասին:

Եթե Թրամփը վստահ լիներ իր դիվանագիտական կարողությունների վրա, ապա նման մանկամիտ քայլի չէր գնա: Նույնիսկ պատերազմող երկրները միմյանց նկատմամբ նման պատժամիջոցներ չեն սահմանում, եւ դիվանագետների համար մշտապես բաց են պահում բանակցելու եւ այցելությունների ճանապարհը»,- ասել է պատգամավորը:

Ըստ նրա՝ նախկինում ասվում էր, որ ԱՄՆ-ը հաճախ երկակի ստանդարտներ է կիրառում, բայց նման քայլով (Զարիֆի դեմ պատժամիջոցների սահմանում-ԽՄԲ.) ցույց տվեց, որ ընդհանրապես չունի որեւէ ստանդարդ:

«ԱՄՆ-ի դեմ մենք պետք է պահպանենք մեր սկզբունքային դիրքորոշումը: Միայն ուժի դիրքերից է պետք խոսել ԱՄՆ-ի հետ, քանի որ փորձը ցույց է տվել, որ միայն այդպես է հնարավոր զսպել այդ երկրին»,- եզրակացրել է Կարեն Խանլարեանը: